म्याग्दीको धवलागिरि गाउँपालिका- ६ मराङको बुलमा रहेको बागेश्वरी आधारभूत विद्यालयको कक्षा कोठामा पहिरोले क्षति पुर्‍याएको छ । 

पहिरोले भवन जोखिममा परेपछि कक्षा ५ सम्म अध्यापन हुने विद्यालयको पठनपाठन रोकिएकोे छ । विद्यालयका प्रधानाध्यापक नवराज उपाध्यायले ६ कोठे भवन पहिरोले भत्कने अवस्थामा पुगेको बताए ।

'भवनको गारो र भुइँ चर्किएर बस्न नमिल्ने अवस्था छ' उनले भने, 'सबैभन्दा जोखिम भएको कक्षा ४ का विद्यार्थीलाई कक्षा ५ मा सँगै राखेर पढाएका छौँ । अरू भवन पनि भत्कने अवस्थामा छन् ।"

४५ जना विद्यार्थी रहेको उक्त विद्यालयको जीर्ण भवनमा बसेर पढ्न विद्यार्थीहरू डराएका छन् । २ कोठे शौचालयकोे गारो चिरा परेर प्रयोग गर्न नमिल्ने भएको छ । विद्यालय भवनको मुनि गत हिउँदमा सडक निर्माण गरिएकाले अहिले सडकबाट पहिरो बग्न थालेको छ ।

गाउँपालिकाका उपाध्यक्ष रेशम पुनमगर, शिक्षा शाखाका प्रमुख ख्यामराज सुवेदी र प्राविधिकहरूको टोलीले मंगलबार पहिरोको जोखिममा रहेको विद्यालय निरीक्षण गरेको छ । उनीहरूले तत्काल थप क्षति हुन नदिन तथा पठनपाठनमा असर पर्न नदिन व्यवस्था मिलाइने र दीर्घकालीन समाधानका लागि पहल गरिने बताए ।