आयरल्याण्ड र स्कटल्याण्ड अर्को वर्ष वेष्ट इन्डिज र अमेरिकामा आयोजना हुने आईसीसी टी- २० विश्वकपमा छनोट भएका छन् । युरोपियन क्षेत्रको छनोटमा बिहीबार आफूअनुकूल नतिजा आएपछि दुवै टोलीले लिग चरणको अन्तिम खेल अगावै विश्वकपमा स्थान पक्का गरेका हुन् ।
बिहीबार जर्मनीविरुद्धको खेल वर्षाका कारण रद्द भएपछि आयरल्याण्ड विश्वकपमा छनोट हुने १३औं टिम बन्यो । बिहीबारै भएको खेलमा स्कटल्याण्डले डेनमार्कलाई ३३ रनले पराजित गर्दै विश्वकप छनोट हुने १४औं टिम बनेको हो ।
७ वटा टिम सहभागी युरोपियन छनोटमा स्कटल्याण्ड सत प्रतिशत जितसहित १० अंक जोडेर शीर्ष स्थानमा छ । अर्को अपराजित टिम आयरल्याण्ड ९ अंकसहित दोस्रो स्थानमा छ । स्कटल्याण्ड र आयरल्याण्डबीच शुक्रबार हुने खेलले युरोपियन छनोटको विजेताको टुङ्गो लाग्नेछ ।
सन् २०२४ मा हुने टी- २० विश्वकपमा कुल २० वटा टोलीले प्रतिस्पर्धा गर्नेछन् । सहभागी टोलीलाई ५ वटा टिम रहेको ४ समूहमा विभाजन गरिनेछ ।
वेष्ट इन्डिज र अमेरिका आयोजकको रूपमा सिधै छनोट हुँदा गत वर्षको टी- २० विश्वकपमा उत्कृष्ट ८ मा रहेका इंग्ल्याण्ड, पाकिस्तान, अस्ट्रेलिया, भारत, न्युजिल्याण्ड, दक्षिण अफ्रिका, श्रीलंका र नेदरल्याण्ड्स पनि सिधै छनोट भएका छन् । यस्तै, सन् २०२२ नोभेम्बरको टी- २० वरीयतामा माथि रहेका अफगानिस्तान र बंगलादेश पनि सिधै छनोट भइसकेका छन् ।
बाँकी ८ स्थानका लागि टी- २० विश्वकपमा युरोप, एसिया र अफ्रिकाबाट २/२ तथा अमेरिका र इस्ट एसिया प्यासिफिक क्षेत्रबाट १/१ टिम छनोट हुने प्रावधान छ ।
एसिया क्षेत्रको अन्तिम चरणको छनोट आगामी नोभेम्बर पहिलो साता नेपालमा हुँदै छ ।
