ओखलढुङ्गामा सौर्य मिनिग्रिडबाट १९१ वटा घरमा विद्युत् उपलब्ध गराइएको छ । जिल्लाको अतिविकट मानिने सुनकोसी गाउँपालिका- ९ को ककनी गाउँमा सौर्य मिनिग्रिडबाट विद्युत् विस्तार गरिएको हो । ककनीमा ६ करोड ४२ लाख ८८ हजार ९३३ रुपैयाँको लागतमा स्थापना गरिएको सौर्य मिनिग्रिडबाट आजदेखि विद्युत् उत्पादन सुरु गरिएको छ ।
ऊर्जा, जलस्रोत तथा सिँचाइ मन्त्रालयका सचिव दिनेशकुमार घिमिरेले मिनिग्रिड उद्घाटन गर्दै यस मन्त्रालय, वैकल्पिक ऊर्जा प्रवर्द्धन केन्द्र र नेपाल विद्युत् प्राधिकरणको सहकार्यमा देशका विकट क्षेत्रमा पनि उज्यालो बनाउने अभियानमा सरकार जुटेको बताए ।
ककनी महत्त्वपूर्ण धार्मिक एवं पर्यटकीय क्षेत्र भए पनि विद्युतको समस्या रहेकाले सौर्य मिनिग्रिड आयोजना सञ्चालन गरिएको उनको भनाइ थियो । त्यस अवसरमा वैकल्पिक ऊर्जा प्रवर्द्धन केन्द्रका सहायक निर्देशक डा. लक्ष्मणप्रसाद घिमिरेले परियोजनाको विस्तृत विवरण प्रस्तुत गरे । उनले आँकलन गरेभन्दा निकै कम ऊर्जा खपत हुने देखिएकाले विद्युत् उपभोक्तालाई ऊर्जाको उच्चतम् खपत गर्न लगाएर आर्थिकस्तर वृद्धि गर्न सुझाव दिए । ककनीमा विद्युत् उपलब्ध गराएर एउटा महत्त्वपूर्ण अभिभारा पूरा गरिएको वडाध्यक्ष हितराज कार्कीले बताए ।
उज्यालो सुनकोसी अभियान थालेको स्थानीय सरकारले अघिल्लो कार्यकालमा रुद्र अधिकारीको नेतृत्वमा विद्युतीकरणको काम सुरु गरेको थियो । भौगोलिक विकटताका कारण केन्द्रीय विद्युत् विस्तार गर्न खर्चिलो हुने र तत्काल विद्युतीकरणको संभावना नहुने भएकाले वडा- ९ का तत्कालीन वडाध्यक्ष तथा ऊर्जा विकास उपसमितिका संयोजक झनककुमार कार्कीले सौर्य मिनिग्रिड स्थापनाको योजना बनाएर पहल गरेका थिए ।
वैकल्पिक ऊर्जा प्रवर्द्धन केन्द्रको ९० प्रतिशत र गाउँपालिकाको १० प्रतिशत लागत गरी कुल ६ करोड ४२ लाख ८८ हजार ९३३ रुपैयाँको लागतमा मिनिग्रिड स्थापना गरिएको हो । मिनिग्रिडबाट ककनीका १९१ वटा घरधुरीका साथै स्थानीय विद्यालय र स्वास्थ्य संस्थामा समेत विद्युत् जडान गरिएको छ । मिनिग्रिड आयोजना २०७९ मङ्सिरदेखि सुरु गरिएको थियो ।
आयोजनामा गाउँपालिकाले ६० लाख र हाउस वायरिङका लागि वडा- ९ ले २ लाख रुपैयाँ उपलब्ध गराएका थिए । मिनिग्रिडको सुविधा नपुगेका १७ वटा घरलाई भने ५० वाटका दरले सोलार वितरण गरिएको छ ।