पाँचथरको फिदिम नगरपालिकाले संस्थागत विद्यालयका शिक्षक तथा कर्मचारीलाई सामुदायिक विद्यालय सरहको सुविधा दिन निर्देशन दिएको छ ।
संस्थागत विद्यालयमा सामुदायिक विद्यालयमा भन्दा निकै कम तलब तथा अन्य सुविधा रहेको गुनासो सुनिएको भन्दै फिदिम नगरपालिकाले नगरको शिक्षा नियमावली, २०७४ को नियम १३ को उपनियम २ बमोजिम गर्न निर्देशन दिएको हो ।
नगरपालिकाका प्रमुख प्रशासकीय अधिकृत प्रवीनहाङ योङहाङका अनुसार उक्त उपनियममा फिदिम नगरपालिकाभित्र सञ्चालन हुने सबै संस्थागत विद्यालयले शिक्षक तथा कर्मचारीलाई तहअनुसार सामुदायिक विद्यालय सरह सुविधा दिनुपर्ने व्यवस्था छ । उक्त उपनियमले तलब स्केल, दसैँ खर्च, बिदा, तालिम र ज्येष्ठता भत्ता सामुदायिक विद्यालयको सरह हुनुपर्ने व्यवस्था गरेको छ ।
यस्तै, सोही नियमावलीको नियम १३ को उपनियम ३ मा शिक्षक, कर्मचारीका लागि नियमित तलबबाट निश्चित प्रतिशत रकम छुट्याई सोही बराबर रकम थप गरी सञ्चयकोषको प्रबन्ध गर्नुपर्ने, उपनियम ५ मा शिक्षक तथा कर्मचारीका २ जनासम्म बालबच्चाको मासिक पढाइ शुल्क लिन नपाउने र उपनियम ८ मा बैङ्क खातामार्फत शिक्षक कर्मचारीलाई तलब भत्ता दिनुपर्ने व्यवस्था गरिएको छ ।
प्रमुख प्रशासकीय अधिकृत योङहाङले सबै संस्थागत विद्यालयलाई पत्र लेख्दै यसबारे भइरहेको प्रगतिको विवरण यथाशीघ्र नगरपालिकामा पठाउन निर्देशन दिएका हुन् ।
