भरतपुर महानगरपालिका र चीनको सिगात्से शहरबीच एकापसमा सहयोग आदानप्रदान गर्ने दुई पक्षीय सहमति भएको छ । ती २ शहरका बीचमा भगिनी सम्बन्ध कायम रहेको छ ।
भरतपुर महानगरपालिका प्रमुख रेनु दाहाल र सिगात्से शहरका मेयर वाड्ग फड्ग हुड्गबीच दुई पक्षीय सहमति भएको हो । २ शहरबीच एकापसमा सहयोग आदनप्रदान गर्दै यहाँका जनताका बीचमा सुमधुर सम्बन्ध कायम गर्दै अगाडि बढ्ने सहमति भएको जनाइएको छ ।
हिमाली शहर सिगात्सेको निमन्त्रणामा सिगात्से पुगेको भरतपुर महानगरपालिकाका प्रतिनिधिमण्डलबीच प्रविधि आदानप्रदान, कृषि र पर्यटनको क्षेत्रमा सँगसँगै अगाडि बढ्दै भगिनी सम्बन्धलाई जनस्तरसम्म विस्तार गर्नुे दुवै शहरका प्रमुखबीच सहमति भएको हो ।
सो अवसरमा भरतपुर महानगरपालिका प्रमुख दाहालले भरतपुर महानगरपालिका पूर्वाधार विकासका साथै कृषि, पर्यटन र स्वास्थ्य सेवाको क्षेत्रमा अगाडि बढिरहेको जनाउँदै सिगात्से सरकार र यहाँका व्यवसायीलाई नेपालको भरतपुरमा लगानी गर्न आग्रह गरिन् ।
सो अवसरमा प्रमुख दाहालले सन् २०२४ लाई भरतपुर महानगरपालिकाले भरतपुर भ्रमण वर्षको रूपमा विशेष कार्यक्रम गरी मनाउन लागेको जनाउँदै भरतपुर भ्रमण वर्षमा सहभागी हुन सिगात्से शहरका मेयर हुड्गसहित उनको टिम र सिगात्सेवासीलाई निमन्त्रणा गरेकी थिइन् ।
सो अवसरमा सिगात्से सिटीका प्रमुख हुड्गले भरतपुर र सिगात्से शहरको सम्बन्धलाई जनस्तरमा देखिनेगरी स्वागत गर्न आफूहरू सधैँ तयार रहेको बताए । कोभिड- १९ को महामारीको समयमा पनि भरतपुरका नागिरकको जीवन रक्षाका लागि स्वास्थ्य सामग्री प्रदान गरेर सानै भए पनि सहयोग पुर्याएको स्मरण गरे ।
सो अवसरमा प्रमुख हुड्गले नेपाल र तिब्बत क्षेत्रसँग व्यवस्थित सडक र रेल सञ्जालमार्फत जोडेर २ देशले लाभ लिनेगरी चीन सरकारले आयोजना अगाडि बढाउन पहल गरिरहेको जनाउँदै त्यसका लागि नेपाल सरकारको ध्यानाकर्षण गरिदिन महानगर प्रमुख दाहालमार्फत आग्रह गरे ।
कार्यक्रममा भरतपुर महानगरपालिकाका उपप्रमुख चित्रसेन अधिकारीले भरतपुर र सिगात्सेबीच कायम रहेको भगिनी सम्बन्धलाई दुई पक्षीय भ्रमणका माध्यमबाट अझ प्रगाढ बनाउँदै लैजानुपर्ने बताएका थिए । सो अवसरमा प्रमुख प्रशासकीय अधिकृत नरेन्द्रकुमार रानाले सिगात्से शहरको भ्रमणले २ शहरबीचको पारस्परिक विश्वासमा थप टेवा पुर्याएको बताए ।
महानगरपालिका प्रमुख दाहालको नेतृत्व रहेको ८ सदस्यीय प्रतिनिधिमण्डलले सिगात्से शहरका ऐतिहासिक एवं पुरातात्त्विक महत्त्वका क्षेत्रको अवलोकन, सडक सञ्जाल हरियाली प्रवर्द्धनका साथै औद्योगिक क्षेत्र र भरतपुरको साइलेज घाँसमार्फत पशुपालन गरिएको एभरेस्ट एग्रो फार्मको अवलोकन गरेको जनाइएको छ ।