म्याग्दी जिल्लाको धवलागिरि गाउँपालिका- ७ धारापानीमा ‘एक घर, एक धारा’सहितको खानेपानी आयोजना निर्माण भएको छ । खानेपानी, जलस्रोत तथा सिँचाइ डिभिजन कार्यालय म्याग्दीले धारापानीमा निजी धारा जडित खानेपानी आयोजना निर्माण भएको हो ।
१ करोड रुपैयाँभन्दा बढीको लागतमा निर्माण भएको आयोजनाबाट २१४ घरमा निजी धारा जडान गरेर खानेपानी वितरण गरिएको धारापानी खानेपानी आयोजनाको उपभोक्ता समितिका अध्यक्ष फतबहादुर खत्रीले जानकारी दिए ।
'आर्थिक वर्ष २०७३/०७४ मा विस्तृत आयोजना प्रतिवेदन (डीपीआर) तयार भएकामा २०७७/०७८ देखि निर्माण सुरु भएको थियो', उनले भने, 'यस आयोजनाको काफलडाँडा र बगरको स्किम यसअघि नै निर्माण सकिएको थियो । धारापानीमा सबै घरमा धारा जडान गरेर खानेपानी वितरण भएको छ ।'
धारापानीकी मञ्जु थापाले घरमै जडान भएको धारामा नियमित खानेपानी आपूर्ति हुन थालेपछि समयको बचत र झन्झट हटेको बताइन् । 'पहिले सार्वजनिक धाराबाट पानी ल्याउन पालो कुर्नुपर्ने थियो', उनले भनिन्, 'घरमै धारा बनेपछि खानेपानीका कारणले विवाद हुन छाडेको छ ।'
यसअघि सार्वजनिक धारामार्फत खानेपानी वितरण हुने आयोजनाको संरचना जीर्ण हुँदा नियमित खानेपानी आपूर्ति नहुने समस्या थियो । धारापानीका बासिन्दा खानेपानी लिन, स्नान र कपडा धुन पँधेरा भन्ने ठाउँमा पुग्ने गर्थे ।
उपभोक्ताको श्रमदानबाहेक १ करोड ११ लाख ९८ हजार २४२ रुपैयाँको लागतमा आयोजना निर्माण भएको खानेपानी, जलस्रोत तथा सिँचाइ डिभिजन कार्यालय म्याग्दीले जनाएको छ । कार्यालयका प्रमुख सुरेन्द्र पौडेलले अनुमानित लागतभन्दा कम खर्चमा आयोजना निर्माण सकिएको बताए ।
'१ करोड ६५ लाख रुपैयाँ लागत अनुमान गरिएको थियो', उनले भने, 'ठेक्कामार्फत काम गर्ने हिसाबले तयार पारिएको लागत अनुमानमा उपभोक्ताले काम गर्दा कर, फिजिकल, आर्थिक प्रशासनिक परामर्श शीर्षकको खर्च घटेको छ ।' कुल लागतको २० प्रतिशत बराबर उपभोक्ताले श्रमदान गरेका छन् ।
कोतखोलाको उत्तिसिनेमा मुहान रहेको आयोजनाको मुख्य पाइप लाइनमा ७५ एमएमको ९ हजार ४९० मिटर पोलिथिन र १ हजार ३०८ मिटर जीआई पाइप जडान भएको छ । २० हजार १३५ मिटर शाखा पाइप लाइन बनाइएको छ । मुख्य र शाखा पाइप लाइन खन्ने र पुर्ने काममा २९ लाख ७४ हजार ८९५, पाइप र फिटिङका सामान खरिदमा २४ लाख ३२ हजार ४६० रुपैयाँ खर्च भएको छ ।
१०० र २० घनमिटर क्षमताको रिजर्भ ट्याङ्की, सामग्री भण्डारगृह, एउटा डीसी र एउटा बीपीटीसहितका संरचना बनाउन ५७ लाख ९० हजार ८८६ रुपैयाँ खर्च भएको कार्यालयले जनाएको छ ।