लालबन्दी भाषा तथा साहित्य पुरस्कार 'बाआमा'लाई
लालबन्दी नगर वाङ्मय परिषद् लालबन्दी, सर्लाहीले 'लालबन्दी नगर वाङ्मय परिषद् भाषा तथा साहित्य पुरस्कार- २०८०' का लागि 'बाआमा'लाई छनोट गरेको छ ।
स्वतन्त्र विज्ञहरूसहितको पुरस्कार छनोट समितिले छनोट गरेका उत्कृष्ट १० वटा कृतिहरूमध्येबाट रामलाल जोशीकृत 'बाआमा' आख्यानले 'लालबन्दी नगर वाङ्मय परिषद् भाषा तथा साहित्य पुरस्कार-२०८०' हात पारेको हो ।
स्वतन्त्र विज्ञहरूसहितको पुरस्कार छनोट समितिले छनोट गरेकाे उत्कृष्ट एक कृति 'बाआमा' सिफारिस गरेपछि परिषद्ले एक विज्ञप्तिमार्फत आज सार्वजनिक गरेको छ । लालबन्दी नगर वाङ्मय परिषद्ले 'लालबन्दी नगर वाङ्मय परिषद् भाषा तथा साहित्य पुरस्कार- २०८०'का लागि उत्कृष्ट १० कृतिहरू २०८० भदौ ९ गते एक प्रेस विज्ञप्तिमार्फत सार्वजनिक गरेको थियो ।
यसरी नै 'लालबन्दी नगर वाङ्मय परिषद् स्थानीय प्रतिभा पुरस्कार- २०८०' नेपाली भाषा तथा साहित्य सेवक एवं अध्यापक देवराज पौडेलले पाउने भएका छन् । लालबन्दी नगर वाङ्मय स्थानीय प्रतिभा पुरस्कारको राशि १० हजार र लालबन्दी नगर वाङ्मय परिषद् भाषा तथा साहित्य पुरस्कार (राष्ट्रिय)को पुरस्कार राशि ५० हजार रुपैयाँ रहेको लालबन्दी नगर वाङ्मय परिषद्का अध्यक्षद्वारा हस्ताक्षरित प्रेस विज्ञप्तिमा उल्लेख छ ।
