अन्तर्राष्ट्रिय क्रिकेट काउन्सिल (आईसीसी)ले सन् २०२३ सम्मका एक दिवसीय र टी-२० विश्वकपको छनोट चरणका सबै खेल इन्टरनेटबाट प्रत्यक्ष प्रसारण गर्ने भएपछि ८० वटा एसोसिएट देशका क्रिकेटप्रेमीमा उत्साह छाएको छ ।
आईसीसीले इभेन्ट र मिडिया कम्पनी आईएमजीसँग सन् २०२३ सम्मका लागि सम्झौता गरेपछि कतपिय एसोसिएट देशका खेल इन्टरनेटमार्फत पहिलो पटक प्रत्यक्ष प्रसारण हुने भएको छ ।
सम्झौताअनुसार अब छनोटका ५४१ वटा खेल इन्टरनेटमार्फत प्रत्यक्ष प्रसारण हुनेछन्, जसमा ४१ वटा छनोट प्रतियोगिता छन् ।
आईसीसी एक दिवसीय विश्वकप २०२३ को छनोट, आइसीसी वुमेन्स टी-२० विश्वकप २०२३ को छनोट र आईसीसी टी-२० विश्वकप २०२२ को छनोटका खेलहरू आईएमजीले इन्टरनेटमार्फत प्रत्यक्ष प्रसारण गर्नेछ ।
प्रत्यक्ष प्रसारण हुने कुल ५४१ खेलमध्ये १४५ वटा खेल महिलाका हुनेछन् । तीमध्ये ८० वटा एसोसिएट देशका खेलको प्रत्यक्ष प्रसारण हुनेछन् ।
नेपालले प्रतिस्पर्धा गर्ने आईसीसी विश्वकप लिग-२ का बाँकी खेल पनि अब इन्टरनेटबाट प्रत्यक्ष प्रसारण हुनेछन् । यो प्रतियोगिता आईसीसी एक दिवसीय विश्वकप २०२३ को छनोट प्रतियोगिता हो ।
यस्तै, नेपालले प्रतिस्पर्धा गर्ने आईसीसी टी-२० वुमेन्स विश्वकप २०२३ को छनोट र आईसीसी टी-२० विश्वकप २०२२ को छनोट पनि अब इन्टरनेटमार्फत नेपाली क्रिकेटप्रेमीले हेर्न पाउनेछन् ।