रघुजीविरुद्ध कोमल वली अदालत जाने
नेकपाका प्रचण्ड-नेपाल खेमाका नेता रघुजी पन्तले आफूविरुद्ध आपत्तिजनक अभिव्यक्ति दिएको भन्दै राष्ट्रियसभाकी सांसद कोमल वलीले न्याय माग्न अदालत जाने बताएकी छन् ।
दाङमा रहेकी वलीले काठमाडौं आएपछि अदालत जाने बताएकी हुन् । नेता पन्तले निच अभिव्यक्ति दिएको पनि उनले बताएकी छन् ।
'उहाँले जसरी कोमल वलीले सारी सर्काएर पिडौँला देखाएर पोइला जान पाम भनेपछि सांसद पद पाएको भन्नुभएको छ, यो उहाँको निच अभिव्यक्ति हो । उहाँले ममाथि मात्र होइन, सफलताप्राप्त महिलाका विषयमा जुन किसिमको अभिव्यक्ति दिनुभयो, त्यो आपत्तिजनक छ', उनले भनिन्, 'साथीभाइहरूसँग सरसल्लाह गर्दै छु । भोलिसम्म दाङमै व्यस्त छु । पर्सि काठमाडौंमा आइसकेपछि मेरो वकिलसँग सरसल्लाह गरेर कानुनी प्रक्रियामा जाने विचार गरेकी छु । म न्यायको लागि अदालतमा जान्छु ।'
पन्तले पार्टीमा लामो योगदान दिएका नेतृहरूले राष्ट्रियसभा सदस्य र केन्द्रीय सदस्य नपाएको तर वलीले दुवै पद पाएको बताएका थिए । नेता पन्तको अभिव्यक्तिको खण्डन गर्दै वलीले लामो फेसबुक स्टाटस लेखेकी थिइन् । रघुजीको अभिव्यक्तिमाथि सामाजिक सञ्जालतिर पनि चर्को आलोचना भएको छ । वली नेकपा ओली खेमामा खुलेकी छन् ।