सोमालियाको राजधानी मोगादिसुस्थित बन्दरगाहमा एक रेस्टुरेन्टको बाहिरपट्टि शुक्रबार अबेर भएको आत्मघाती  कार बम बिस्फोटमा परी कम्तीमा २० जनाको मृत्यु भएको र ३० जनाभन्दा बढी घाइते भएको जनाइएको छ ।

स्थानीय बासिन्दा अहमद अब्दुल्लाहीलाई उदृत गर्दै द हिन्दुस्तान टाइम्सले जनाएअनुसार लुउल येमिनी नाम गरेको रेस्टुरेन्टमा एउटा गुुुडिरहेको कार बिस्फोट भएको थियो । उनी रेस्टुरेन्टतिरै जाँदै गरेका र त्यही क्रममा कम्पनसहित भएको उक्त बिस्फोटको धुवाँको मुस्लोले त्यहाँ सबै ढाकिएको हुनाले आफू दौडिँदै फर्किएको उनले बताएका छन् ।

अफ्रिकी मुलुकहरूमा आफ्नो समूहको सरिआ कानुनअनुसारको शासन स्थापना गर्न भन्दै अभियान चलाएको अल शबाब नामक इस्लामिक अतिवादी समूहले  सोमालिया र आसपासका क्षेत्रमा बारम्बार यस प्रकारका बिस्फोट गराउँदै आएको भए तापनि हालसम्म यो बिस्फोटको जिम्मा कसैले लिई नसकेको बताइएको छ ।