अखिल नेपाल फुटबल संघ (एन्फा)को आयोजनामा शहीद स्मारक सी डिभिजन लिग फुटबल आजदेखि सुरु हुँदै छ । गत वर्ष हुनुपर्ने लिग कोरोना महामारीका कारण रोकिएको थियो ।
यस पटक एन्फाले नयाँ संरचनामा सी डिभिजन लिग आयोजना गर्ने जनाएको छ । १४ टिमले प्रतिस्पर्धा गर्ने लिगमा जम्मा ५२ वटा खेल हुनेछन् । यसबाट ३ वटा टीम बी डिभिजनमा बढुवा हुनेछन् भने एउटा टिम रेलिगेसनमा पर्नेछ ।
लिगमा सहभागी १४ वटा क्लबलाई २ समूहमा विभाजन गरिएको छ । समूह ‘ए’मा वीरगन्ज युथ एकेडेमी, खालीबारी युथ एफसी, मनोहरा युनाइटेड क्लब, सानो गौचरण युथ क्लब, समाज कल्याण खेलकुद केन्द्र, महावीर क्लब र झापा एफसी छन् ।
समूह ‘बी’ मा प्लानिङ ब्वाइज युनाइटेड, ओसिस क्लब, सानेपा क्लब, सामाजिक युवा क्लब, स्वयम्भू क्लब, वीरगन्ज युनाइटेड क्लब र चर्च ब्वाइज युनाइटेड क्लब छन् ।
दुवै समूहको खेल राउण्ड रोविन लिगका आधारमा हुनेछ । २ समूहका कूल ४२ वटा खेल हुनेछन् । पहिलो चरणपछि सुपर लिग हुनेछ, जसमा ९ खेल हुनेछन् भने रेलिगेसनका लागि एउटा प्लेअफ खेल हुनेछ ।
समूह ‘ए’मा रहेका खालीबारी युथ क्लब र झापाबीच आज उद्घाटन खेल हुँदै छ । समूह ‘बी’मा रहेका ओसिस र चर्च ब्वाइजबीच अर्को खेल हुनेछ । पहिलो चरणको अन्तिम खेल २४ चैतमा समाज कल्याण खेलकुद केन्द्र र महावीर क्लब तथा स्वयम्भू र वीरगन्जबीच हुनेछ ।
पहिलो चरणको खेलपछि दुवै समूहका शीर्ष ३ स्थानमा रहने टोली दोस्रो चरण अर्थात सुपर सिक्समा प्रवेश गर्नेछन् । जहाँ एक टिमले तीन खेल खेल्नेछ । सुपर सिक्सका एउटा समूहको क्लबले अर्को समूहको तीन क्लबसँग मात्र खेल्नेछ ।
त्यस्तै दुवै समूहको पुछारमा रहने टोलीबीच रेलिगेसनको लागि प्लेअफ खेल हुनेछ । उक्कत खेलमा पराजित हुने टोली ‘सी’ डिभिजन क्वालिफायरमा घटुवा हुनेछ । सुपर लिगको ९ खेलपछि शीर्ष तीन टोली ‘बी’ डिभिजन लिगमा बढुवा हुनेछन् ।