स्पेनिस ला लिगा फुटबलमा बार्सिलोनाले हुएस्कामाथि सानदार जीत निकालेको छ । सोमबार राती बार्सिलोनाको घरेलु मैदानमा भएको खेलमा बार्सिलोनाले हुएस्कामाथि ४-१ को जीत निकालेको हो ।

खेलको १३औँ मिनेटमै गोल गर्दै कप्तान लियोनेल मेस्सीले बार्सिलोनालाई अग्रता दिलाएका थिए । ३५औँ मिनेटमा एन्टोइन ग्रिजमनले गोल गरेपछि खेल २-० को अवस्थामा पुग्यो ।

पहिलो हाफको इन्जुरी समयमा हुएस्काका राफा मिरले गोल गर्दै खेललाई २-१ को स्थितिमा पुर्‍याए ।

५३औँ मिनेटमा बार्सिलोनाका ओस्कार मिनगुइजाले गोल गर्दै ३-१ को स्थितिमा पुर्‍‍‍याएको खेलमा ९०औँ मिनेटमा मेस्सीले व्यक्तिगत दोस्रो गोल गरेपछि खेल ४-१ को अवस्थामा पुगेको हो ।

यो जीतसँगै २७ खेलबाट ५९ अंक बटुलेको बार्सिलोना दोस्रो स्थानमा छ । हुएस्का भने अंक तालिकाको पुछारमा छ ।