केही दिनदेखि काठमाडौंँ उपत्यकामा बढेको वायु प्रदूषणले वातावरणविद् र स्वास्थ्यविद् चिन्तित बनेका छन् । यससँगै सर्वसाधारणमा समेत त्रास बढेको छ ।

यसैबीच वातावरण विभागले काठमाडौँ उपत्यकामा वायु प्रदूषण उच्च भएकाले घरबाहिर ननिस्कन सबैमा अपिल गरेको छ । 

विभागले आइतबार वित्तप्ति जारी गर्दै १३ चैतदेखि काठमाडौँ उपत्यकासहित देशका विभिन्न भागमा वायु प्रदूषणको स्तर अत्यधिक बढेकाले मानिसलाई घरबाहिर ननिस्कन अपिल गरेको हो ।

अहिलेको वायु प्रदूषणले बालबालिका, जेष्ठ नागरिक, दम, खोकी जस्ता श्वासप्रश्वाससम्बन्धी बिरामी र मुटु रोगीहरूलाई बढी असर गर्ने विज्ञप्तिमा उल्लेख छ ।

प्रदूषण उत्पन्न हुने आगो नबाल्न र सवारी साधन कम चलाउन विभागले सबैलाई अनुरोध पनि गरेको छ । सचेतना नअपनाए अझै खराब स्थिति आउन सक्ने विभागको भनाइ छ । काठमाडौं उपत्यकाको रियल टाइम एयर क्वालिटी इन्डेक्स ३०० भन्दा बढी पुगेको छ । यो भनेको खतराको संकेत भएको विज्ञहरू बताउँछन् ।